- Siunertaq:
§ 1. Kalaallit Nunaanni eqqumiitsuliornermut aningaasaateqarfiup siunertaraa siuarsassallugit Kalaallit Nunaanni eqqumiitsuliornikkut ingerlatsineq, aamma kalaallit nunani allani eqqumiitsuliornikkut ingerlatsinerat, sapinngisamillu qularnaarniassallugu innuttaasut siammasissumik aamma tamatigoortumik kalaallit eqqumiitsuliaannik eqqumiitsuliornikkullu ingerlatsinerannik periarfissaqarnissaat, aamma eqqumiitsuliornikkut nunani allaneersunik periarfissaqartinneqarnissaat.
(Kalaallit Nunaanni Eqqumiitsuliornermut Aningaasaateqarfik pillugu Namminersorlutik Oqartussat nalunaarutaat nr. 43, 13. aggusti 2021-imeersoq)
- Siulersuisut, allattoqarfik aammalu suliamik paasisimasallit:
Siulersuisut inassuteqarsinnaasuniit assigiinngitsuniit inassuteqarnikkut Naalakkersuisumit toqqarneqartarput ukiut sisamakkaartunik, 2022 – 2025. Siulersuisuni ilaasortani pingasut Eqqumiitsuliortut kattuffiat EPI-mit inassutigineqarput, ilaasortaq ataaseq Sulisitsisunit inassutigineqarpoq, kiisalu ilaasortaq ataaseq Katuamit inassutigineqarluni.
Siulittaasut ivertinneqarput septembarimi 2021-mi, januari 2022-miillu eqqumiitsuliornermut aningaasaateqarfik pisortatigoortumik aningaasaateqarfittut atuutilerluni.
Aningaasaateqarfiup allattoqarfia Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi inissisimavoq, suliamillu paasisimasalinnik toqqaasoqarsimavoq qinnuteqaatinik suliaqartussanik, eqqumiitsuliornermut aningaasaateqarfiup siulersuisuinullu inassuteqaasiorlutik.
Siulersuisut:
- Siulittaasoq Arnakkuluk Jo Kleist
- Tullersorti Jacob Froberg
- Ilaasortaq Ujammiugaq Engell
- Ilaasortaq Ane Marie Ottosen
- Ilaasortaq Hans Jukku Noahsen
